Ukestra do medio – Histórias cativas

Acabamos de recibir o disco “Histórias cativas” (Ukelixo, 2022) dos composteláns Ukestra do medio, e dende o primeiro xiro parécenos que vai a ser unha das sorpresas deste ano.

O terceiro disco deste grupo tan particular agocha unha manchea de cancións fantásticas, abrazadas a preciosas melodías que non se deixan ocultar entre os sons e os arranxos que forman a carapuchiña sónica elexida por Ukestra do medio para vestir a súa música. “Paipo” é un instrumental con aroma a vellas rúas e calexóns. “Tanto se amavan” (poema musicado de Ricardo Carvalho Calero) é un conto que podería estar sin problema en discos como “Entresemana” de Le mans ou o “Popemas” de Nosoträsh. “Vendeu-no todo” é unha peza de bluegrass que nos trae á memoria os últimos traballos de Family folks. “Sonhos” é unha versión da optimista canción de Ruxe ruxe. “Imitación á vida” é un maravilloso bolero a medio tempo, cunha letra chea de fermosas referencias. “Onde vam?” é unha canción eminentemente pop na súa melodía. “Fove foot two, eye of blue” é unha versión dunha peza de swing dos anos 20. E, para rematar, “Promesas”, outro tema pop marcado por un ritmo amoroso e delicado.

“Histórias cativas” é un disco que pecha, quizáis, un pequeno círculo que uniría a Ukestra do medio coas cancións máis minimalistas de Apenino e os discos de Os amigos dos músicos. Unha fantástica compañía coa que andar.